Khua bruă kƀĭn ala Vương Đình Huệ lač, hlăm giăm 50 thŭn êgao, klei bi hgŭm bruă sang hră mơar, mâo mjuăt bi hriăm leh phung knhăk kơ lăn čar lehanăn jing leh klei mngač jăk hlăm bruă bi hgŭm dua nah. Ară anei mâo truh 30 êbâo čô phung hriăm gưl prŏng mơ̆ng Việt Nam hlăk dôk hriăm lehanăn ksiêm duah ti Australia. Khua bruă kƀĭn ala đăo knang, mơ̆ng klei bi trông anei srăng pŏk phai ti sa gưl mrâo hgŭm bruă dua nah hŏng klei kjăp hĭn, mđĭ bruă bi mguôp dua ala čar kluôm ênŭm hĭn.

Ti anôk bi trông, Khua bruă kƀĭn ala Vương Đình Huệ, Khua bi ala knŭk kna Australia ti Việt Nam Andrew John Lech Goledzinowski dlăng klei kuôl kă dŭm boh sang hră gưl prŏng Việt Nam lehanăn Australia bi kuôl truh kơ 12 mta hră mơar, hră čih pioh kơ klei bi mjĕ êrô phung hriăm gưl prŏng, phung nai mtô lehanăn bi hgŭm ksiêm duah, mjuăt bi hriăm hlăm dŭm mta bruă êlan klông, bruă lŏ hma, lehanăn kdrăp mnơ̆ng./.