Ƀri wưng pŏk klei kƀĭn tal 4, bruă kƀĭn ala gưl 15 leh anăn bi hdơr 92 thŭn hruê mkŏ mjing êpul hgŭm bruă phung mniê Việt Nam, tlam mbruê 20/10, ti sang bruă Khua lăn čar, Khua lăn čar Nguyễn Xuân Phúc bi tuôm leh hŏng phung bi ala mniê jing phung khua gĭt gai, khua gĭt hđăp mơ̆ng Đảng, knŭk kna leh anăn phung khua êmua mniê mơ̆ng bruă Đảng gưl dlông tal 13, phung bi ala mniê bruă kƀĭn ala gưl 15.

Nao hlăm klei bi tuôm mâo Khua knŭk kna Phạm Minh Chính, Khua bruă kƀĭn ala Vương Đình Huệ, Khua bruă kƀĭn ala hđăp Nguyễn Thị Kim Ngân. Khua lăn čar mñă klă, Đảng leh anăn knŭk kna yap yuôm bhăn bruă mđĭ kyar êpul knuă druh mniê hlăm klei mđĭ kyar bruă kđi čar mơ̆ng gưl dlông truh kơ nah gŭ, hră mơar klei kƀĭn, hdră mtrŭn gưl dlông bơ̆k bâo sơăi kơ boh klei anei. Hlăm grăp gưl bruă kƀĭn ala, phung bi ala mniê bi êdah nanao klei jhŏng, klei thâo mĭn, klei thâo jing phung mniê kdlưn hĭn, bi ala kơ mnuih ƀuôn sang. Khua lăn čar mtă kơ gưl bruă Đảng nah gŭ, bruă sang čư êa alŭ wăl, dŭm Phŭn, dhar bruă lŏ dơ̆ng uêñ mĭn, klă klơ̆ng, mâo boh tŭ dưn bruă hluê ngă dŭm hdră bhiăn kơ bruă phung mniê, bi lar hĭn bruă klam phung mniê hlăm klei đĭ kyar bruă duh mkra – ala ƀuôn, bruă kđi čar, boh nik jing bruă klam phung mniê bi ala bruă kƀĭn ala.