Mmăt mbruê 1/11, Khua gĭt gai Đảng Nguyễn Phú Trọng leh anăn êpul bi ala gưl dlông Việt Nam wĭt truh leh ti Hà Nội, mjưh ruê̆ jăk siam gưl nao čuă ala čar China hluê si klei iêo jak mơ̆ng khua gĭt gai China Tập Cận Bình. Hlăm mmông nao čuă, Khua gĭt gai Đảng Nguyễn Phú Trọng mâo leh klei blŭ hrăm hŏng khua gĭt gai China Tập Cận Bình, bi tuôm hŏng Khua knŭk kna Lý Khắc Cường, bi tuôm hŏng khua bruă kƀĭn ala Lật Chiến Thư leh anăn khua gĭt gai Chính Hiệp Uông Dương.

Hlăm klei nao čuă, 2 tĭng bi klă 13 mta hră mơar bi mguôp hlăm dŭm mta bruă, ba mdah klei bi klă mbĭt Việt Nam – China mâo 13 mta. Mñă klă, klei nao čuă ala čar China mơ̆ng Khua gĭt gai Đảng Nguyễn Phú Trọng dưi tŭ jing jăk siam, đru hlăm bruă bi lar klei bi mguôp, bi hgŭm knhuah gru Việt Nam – China, mtrŭt mđĭ leh anăn bi êlam hĭn klei mjĕ giăm, klei bi mguôp kluôm ênŭm Việt Nam – China hlăm wưng mrâo, mtrŭt mđĭ klei êđăp ênang, hơĭt kjăp leh anăn mđĭ kyar hlăm alŭ wăl, wăt kơ tar rŏng lăn.