Tlam mbrue (31/10), ti sang bi kƀĭn prŏng yang ƀuôn, leh knăm drông, Khua gĭt gai Đảng Nguyễn Phú Trọng mâo leh klei bi trông hŏng Khua gĭt gai Tập Cận Bình..

Khua gĭt gai Đảng Nguyễn Phú Trọng lač, Việt Nam lehanăn China jing dua ala čar bi knông mbĭt, čư̆ lir čư̆, êa sa hnoh, jing ala čar yang ƀuôn ngă phŭn êngiê mâo Đảng Cộng sản sơăi kiă kriê. Dua nah bi tŭ ư lŏ dơ̆ng bi mjĕ êrô, bi tuôm gưl dlông jêñ jêñ plah wah dua Đảng, dua ala čar, kñăm bi thâo săng hĭn, pral mâo klei bi blŭ hrăm, mghaih msir ya mta bruădôk ka thâo bi djŏ, mâo nanao klei hgŭm mbĭt, lehanăn mđĭ hĭn hŏng klei tŭ dưn hgŭm bruă duh mkra, mnia mblei, klei duh bi liê, mjing atur kjăp kơ klei mđĭ kyar dua nah, lmñă Việt Nam – China jing ƀĭng hgŭm duh mkra mnia mblei yuôm bhăn lehanăn mâo lu klei găl hĭn hdơ̆ng găp.

Khua gĭt gai Tập Cận Bình lač, China srăng gĭt krơ̆ng bi kjăp nanao klei bi mguôp hŏng Việt Nam, hlue hdră êlan srăng mtăp mđơr hĭn, mjing djăp klei găl kơ Việt Nam mâo čhĭ lu hĭn mnơ̆ng kơ China, boh nik jing boh mnga bruăl ŏ hma, dliê kyâo, mnơ̆ng hlăm êa kơ China hlăm wưng tinăp./.