Lŏ dơ̆ng klei nao čuă ala čar China, aguah mbruê 1/11, Khua gĭt gai Đảng Nguyễn Phú Trọng bi tuôm leh hŏng Khua knŭk kna China Lý Khắc Cường. Dua Đảng, 2 knŭk kna leh anăn mnuih ƀuôn sang 2 ala čar mâo leh klei sa ai, bi đru hdơ̆ng pô hlăm klei bi blah sua wĭt klei êngiê kơ djuê ana êlâo dih leh anăn bruă mkŏ mjing ala čar yang ƀuôn ngă phŭn ară anei.

Việt Nam dlăng yuôm bhăn leh anăn mđĭ kyar tal êlâo klei mjĕ giăm hŏng China, êlâo êdei msĕ sa, rơ̆ng kơ hdră “sa ala čar China”. Hlăm klei bi tuôm, 2 tĭng bi êdah klei hơ̆k mơak ti anăp klei đĭ kyar jăk hlăm klei mjĕ giăm 2 Đảng, 2 ala čar hlăm wưng êgao.

2 tĭng bi tŭ ư hlăm wưng mđĭ kyar mrâo mơ̆ng 2 Đảng, 2 ala čar hlăm wưng ară anei srăng mđĭ hĭn klei bi mguôp hlăm djăp mta bruă, mâo nanao klei bi trông, bi tuôm gưl dlông, mđĭ hĭn klei đăo knang bruă kđi čar, krŭ wĭt đĭ kyar, mtrŭt mđĭ klei bi mguôp bruă mnia mblei, duh bi liê, mkŏ mjing tur knơ̆ng mnơ̆ng dhơ̆ng, boh kdrŭt kơ klei đĭ kyar klei mjĕ giăm 2 ala čar, bi mguôp ba klei mnia mblei 2 nah đĭ hơĭt kjăp hĭn.