Tlam mbrue (13/11), Khua gĭt gai Đảng Nguyễn Phú Trọng drông čhưn leh Khua knŭk kna Alemang Olaf Scholz ƀri ñu hriê čhưn ti Việt Nam. Khua gĭt gai Đảng bi myuôm boh tŭ dưn jăk siam mơ̆ng klei bi blŭ hrăm plah wah Khua knŭk kna Alemang lehanăn Khua knŭk kna Phạm Minh Chính, bi mni kơ klei bi tŭ ư hgŭm bruă dŭm phŭn dhar bruă dua nah mâo kuôl kă leh, bi klă Việt Nam dlăng yuôm klei bi mguôp kluôm ênŭm hŏng Alemang.

 Khua gĭt gai Đảng bi blŭ hrăm hŏng khua knŭk kna Alemang kơ dŭm hdră êlan, hdră mă bruă prŏng kñăm mđĭ hĭn klei hgŭm hlăm djăp mta bruă, mtrŭt klei mjĕ mgiăm hgŭm mbĭt dua nah tŭ jing hĭn, atăt dua ala čar čhuang hlăm sa êwang mrâo kơ klei mđĭ kyar bi năng hŏng klei găl dua nah. Hơêč hmưi kơ boh tŭ dưn prŏng Việt Nam mâo leh hlăm klei mđĭ kyar lăn čar, Khua knŭk kna Alemang yap klei bi mguôp ALemang hŏng Việt Nam mâo bruă klam yuôm bhăn snăk hŏng tač êngao, hlăm anăn bruă klam Việt Nam hŏng ASEAN./.