Hruê mbruê 23/10, ti anôk bruă Đảng gưl dlông, Phŭn bruă kđi čar, Êpul khua bruă Đảng mkŏ mjing klei kƀĭn trông kluôm ala êlan online bi mguôp hŏng klă anăp kñăm hyuă kjăp leh anăn hluê ngă hdră mtrŭn mrô 24 mơ̆ng Phŭn bruă kđi čar gưl 13 kơ klei mđĭ kyar bruă duh mkra ala ƀuôn, rơ̆ng klei êđăp ênang, bruă lĭng kahan krĭng Ngŏ Dhŭng truh ti thŭn 2030, hdră tă truh ti thŭn 2045. Khua gĭt gai Đảng Nguyễn Phú Trọng gĭt gai leh anăn mâo klei blŭ yuôm bhăn hlăm klei kƀĭn. Krĭng Ngŏ Dhŭng mâo ƀuôn prŏng Hồ Chí Minh leh anăn 5 čar gưl dlông jing Tây Ninh, Bình Phước, Bình Dương, Đồng Nai, Bà Rịa - Vũng Tàu.

Jing krĭng mâo k’hưm, bruă klam yuôm bhăn hlăm klei mđĭ kyar bruă duh mkra – ala ƀuôn, rơ̆ng klei êđăp ênang leh anăn bruă hŏng tač êngao ti ala čar. Blŭ hlăm klei kƀĭn, Khua gĭt gai Đảng Nguyễn Phú Trọng đăo knang: Gưl bruă Đảng nah gŭ, bruă sang čư êa leh anăn mnuih ƀuôn sang hlăm krĭng Ngŏ Dhŭng srăng dưi bi lar ktang hĭn klei hriăm mlih mrâo, klei hưn mthâo bruă cách mạng, klei jhŏng ktang hing ang leh anăn knhuah hdĭp jăk siam, mbruă, klei khăp krĭng Ngŏ, gĭr ktưn bi lar ktang hĭn, hluê ngă tŭ jing hdră mtrŭn mơ̆ng phŭn bruă kđi čar gưl tal anei, mkŏ mjing klei mlih mrâo, kdlưn hĭn hlăm klei mđĭ kyar bruă duh mkra ala ƀuôn leh anăn rơ̆ng bruă lĭng kahan, klei êđăp ênang krĭng Ngŏ Dhŭng.