Leh êbeh 3 mmông phiơr, hlăm brô 1 mmông 20 mnĭt tlam mbruê 30/10, hluê mmông alŭ wăl, êdeh phiơr mdiăng Khua gĭt gai Đảng Nguyễn Phú Trọng leh anăn Êpul bi ala gưl dlông Việt Nam truh leh ti tač êdeh phiơr prŏng Bắc Kinh, kčưm klei nao čuă ala čar China hluê si klei iêo jak mơ̆ng khua gĭt gai China Tập Cận Bình.

Klei nao čuă anei dưi mkŏ mjing leh klei kƀĭn prŏng tal 20 Đảng cộng sản China mjưh ruê̆ tŭ jing, Êpul khua gĭt gai mrâo dưi ba mdah leh anăn Tập Cận Bình lŏ dưi čuăn ruah jing khua gĭt gai Đảng wưng păn bruă tal 3. Bruă Khua gĭt gai Đảng Nguyễn Phú Trọng jing khua gĭt gai ala čar tač êngao tal êlâo nao čuă ala čar China brei ƀuh klei yuôm bhăn mơ̆ng klei mjĕ giăm plah wah Việt Nam leh anăn China ăt msĕ hŏng klei mjĕ giăm plah wah Đảng cộng sản China leh anăn Đảng cộng sản Việt Nam.

Mñă klă hdră êlan mơ̆ng Việt Nam jing dlăng yuôm bhăn klei mjĕ giăm hŏng China jing bruă tal êlâo hĭn hlăm hdră êlan hŏng tač êngao, hmăng hmưi dưi mđĭ kyar sui, hơĭt kjăp, ƀrư̆ hruê ƀrư̆ mâo boh tŭ dưn. Hruê anei, 31/10, knăm tŭ drông Khua gĭt gai Đảng Nguyễn Phú Trọng dưi mkŏ mjing kdrăm k’ah ti anôk kƀĭn prŏng yang ƀuôn Bắc Kinh mơ̆ng khua gĭt gai China Tập Cận Bình jing pô kiă kriê. Leh knăm tŭ drông, khua gĭt gai 2 ala čar ngă klei blŭ hrăm gưl dlông leh anăn ktuê dlăng knăm bi klă lu mta hră mơar yuôm bhăn.