Khua gĭt gai Đảng bi trông kơ dŭm boh tŭ dưn prŏng prĭn, kluôm dhuôm mơ̆ng Việt Nam gĭr mâo leh, mkŏ mjing ngăn dưn, ai dưi, kơhưm hlăm tar rŏng lăn msĕ si ară anei, mñă klă hdră kiă kriê êngiê, čŏng pô, hdră êlan lu tĭng, lu jơr klei mjĕ giăm hŏng tač êngao, hlăm anăn dlăng yuôm bhăn klei mjĕ giăm hŏng dŭm lăn čar riêng gah. Khua knŭk kna Anwar Ibrahim hâo hưn hŏng Khua gĭt gai Đảng Nguyễn Phú Trọng kơ boh tŭ dưn klei blŭ hrăm hŏng Khua knŭk kna Phạm Minh Chính, mñă ktang hmăng hmưi mtrŭt mđĭ klei bi mguôp kluôm dhuôm hŏng Việt Nam, hlăm anăn mâo klei mjĕ giăm đảng, kah mbha klei thâo gĭt gai leh anăn đĭ kyar, bi mguôp bruă duh mkra, bruă lĭng kahan, klei êđăp ênang hŏng dŭm mta bruă mrâo msĕ si bruă duh mkra mrô, klei êđăp ênang internet leh anăn bi mdrơ̆ng hŏng dŭm klei lông dlăng mrâo.

Khua knŭk kna Anwar Ibrahim ăt kah mbah klei blŭ hŏng Khua gĭt gai Đảng kơ bruă gang mkhư̆ klei ƀơ̆ng ngăn, klei amâo mâo djŏ ti Malaysia leh anăn hmăng hmưi 2 tĭng mđĭ hĭn klei bi mguôp, kah mbha klei hriăm hlăm bruă anei. Khua gĭt gai Đảng Nguyễn Phú Trọng bi êdah klei đăo knang klei hriê čuă mơ̆ng Khua knŭk kna Anwar Ibrahim jing gru kruăk mrâo, đru mtrŭt mđĭ klei đĭ kyar hdră êlan plah wah 2 ala čar.