Khua gĭt gai Đảng Nguyễn Phú Trọng bi mni kơ klei hriê čuă mơ̆ng Khua mil čhil Uganda, mñă klă bruă anei mâo boh tŭ dưn yuôm bhăn, pŏk sa wưng đĭ kyar mrâo plah wah 2 Đảng, 2 ala čar.

Hlăm ai êwa h’uh mđao, Khua gĭt gai Đảng Nguyễn Phú Trọng mñă klă klei găl bi mguôp 2 ala čar hlăm djăp mta bruă dôk prŏng êdi, bi êdah dŭm hdră tă prŏng, mtrŭt mđĭ klei bi mguôp bruă kđi čar, bruă duh mkra, dhar kreh, mđĭ klei bi thâo săng hdơ̆ng pô, bi mguôp hlăm dŭm klei bi kƀĭn lu tĭng, mñă klă klei yuôm bhăn mơ̆ng klei bi mguôp bruă kđi čar leh anăn hdră gĭt gai mơ̆ng 2 ala čar hlăm bruă mđĭ klei mjĕ giăm 2 tĭng. 2 tĭng bi tŭ ư gĭr ktưn mtrŭt mđĭ klei mjĕ giăm 2 tĭng mâo boh tŭ dưn hĭn, klă klơ̆ng hĭn, ba klei mjĕ giăm nao hlăm wưng đĭ kyar mrâo hŏng klei hmăng hmưi leh anăn klei găl mơ̆ng 2 ala čar.