Khua gĭt gai Đảng Tô Lâm lŏ mñă klă hdră êlan mơ̆ng Đảng, knŭk kna leh anăn mnuih ƀuôn sang Việt Nam dlăng yuôm bhăn leh anăn gĭr ngă jih jang hlăm ai dưi pô, mbĭt hŏng Đảng, knŭk kna leh anăn mnuih ƀuôn sang Cuba amâo mâo mdei klei pŏk mlar leh anăn mtrŭn agha êlam hĭn klei bi hgŭm knhuah gru leh anăn bi mguôp kluôm dhuôm Việt Nam – Cuba, kyua boh tŭ mnuih ƀuôn sang dua ala čar, kyua bruă mkŏ mjing hdră êlan yang ƀuôn ngă phŭn êđăp ênang, hơĭt kjăp, bi mguôp leh anăn mđĭ kyar dlông rŏng lăn.

Khua gĭt gai Tô Lâm lŏ bơ̆k bâo kơ boh tŭ dưn yuôm bhăn dưi mâo hlăm gưl nao čuă gưl knŭk kna truh kơ ala čar Cuba mơ̆ng Khua gĭt gai, mñă klă klei tŭ ư gưl dlông mơ̆ng khua gĭt gai dua Đảng, dua knŭk kna hlăm dŭm hdră tă leh anăn bruă bi mguôp tal êlâo msĕ si: bruă lŏ hma, pui kmlă, mnia mblei, kdrăp sinh học, mbĭt anăn mtrŭt mđĭ klei bi mguôp kjăp hlăm bruă răng mgang klei êđăp ênang, bruă lĭng kahan, bruă hŏng tač êngao leh anăn dŭm mta bruă mjĕ mjuk plah wah dŭm dhar bruă, gưl bruă leh anăn mnuih ƀuôn sang dua ala čar.