Hŏng ai tiê “Phung êdam êra Việt Nam, khăp kơ ala čar – čang hmang – hgŭm mguôp – ba anăp – mĭn mrâo, đăo knang mŭt hlăm wưng mrâo”, Klei kƀĭn mâo bruă klam tĭng dlăng boh tŭ hdră bruă mơ̆ng Êpul lehanăn hdră êdam êra wưng thŭn 2019 – 2024, mkŏ mkra mta kñăm, bi mklă bruă klam, hdră msir mơ̆ng hdră bruă Êpul lehanăn hdră êdam êra wưng thŭn 2024 – 2029. Blŭ ti knăm anei, Khua gĭt gai Đảng Tô Lâm mñă, hlăm wưng cách mạng, Đảng drei mđing êdi kơ hdră êdam êra.

Khua gĭt gai Đảng mtă, brei bi mklă bruă klam mơ̆ng êdam êra lehanăn klei yuôm mơ̆ng hdră êdam êra hlăm wưng cách mạng mrâo mơ̆ng Đảng, mơ̆ng djuê ana. Khua gĭt gai Đảng mtă brei mlih mrâo hdră bruă Êpul, Đoàn, mkŏ mjing êpul knuă druh kjăp ktang; bi mklă bruă klam mơ̆ng Êpul, mơ̆ng Êpul êdam êra Cộng sản Hồ Chí Minh hlăm hdră mjuăt bi hriăm knhuah cách mạng, msưh kdŭn klei toh hroh hlăm knhuah hdĭp phung êdam êra, sinh viên, hđeh hriăm hră./.