Tŭ klei iêo jak mơ̆ng Khua bruă kƀĭn ala Vương Đình Huệ, Khua gĭt gai Thượng viện ala mtao Campuchia Samdech Say Chhum ba anăp êpul bi ala gưl dlông Thượng viện Campuchia truh leh ti ƀuôn prŏng phŭn Hà Nội, klă klơ̆ng hriê čuă Việt Nam mơ̆ng hruê 24 – 26/10.

Anei jing bruă kđi čar hŏng tač êngao plah wah Bruă kƀĭn ala Việt Nam leh anăn Thượng viện Campuchia hlăm thŭn 2022, jing thŭn bi hgŭm plah wah Việt Nam – Campuchia, Campuchia – Việt Nam, ƀri wưng bi hdơr 55 thŭn hruê mkŏ mjing klei mjĕ mgiăm plah wah 2 ala čar (24/6/1967), đru mđĭ hĭn klei bi mguôp, đăo knang plah wah 2 Đảng, 2 knŭk kna leh anăn 2 anôk bruă mkŏ mjing klei bhiăn. Klei hriê čuă mơ̆ng Khua gĭt gai Thượng viện ala mtao Campuchia Samdech Say Chhum jing wưng brei 2 tĭng ksiêm wĭt, bi klă dŭm boh tŭ klei bi mguôp plah wah 2 anôk bruă mkŏ mjing klei bhiăn hlăm hruê mmông êgao, đru bi kjăp leh anăn mtrŭt mđĭ klei mjĕ giăm jăk siam, klei bi hgŭm knhuah gru, bi mguôp kluôm ênŭm, kjăp leh anăn sui plah wah 2 ala čar.