Tŭ klei iêo jak mơ̆ng Khua lăn čar Nguyễn Xuân Phúc, hruê anei 21/10, khua kiă kriê Êpul hgŭm lu ala čar António Guterres kčưm gưl hriê čuă ala čar Việt Nam. Hruê mmông êgao, klei bi mguôp plah wah Việt Nam leh anăn Êpul hgŭm lu ala čar amâo mâo mdei dưi bi kjăp leh anăn mđĭ hĭn.

Klei hriê čuă djŏ hlăm wưng bi hdơr 45 thŭn Việt Nam mŭt hlăm Êpul hgŭm lu ala čar leh anăn Việt Nam mrâo bi leh tŭ jing bruă klam jing khua kiă kriê djŏ tuôr Êpul gơ̆ng răng mgang klei êđăp ênang mơ̆ng Êpul hgŭm lu ala čar, mbĭt anăn ăt mrâo lŏ djŏ ruah jing pô hgŭm hlăm Êpul gơ̆ng klei dưi êngiê anak mnuih Êpul hgŭm lu ala čar wưng thŭn 2023 – 2025. Mĭn tĭng hlăm klei hriê čuă, khua kiă kriê Êpul hgŭm lu ala čar srăng bi tuôm hŏng Khua gĭt gai Đảng Nguyễn Phú Trọng, blŭ hrăm hŏng Khua lăn čar Nguyễn Xuân Phúc, bi tuôm hŏng Khua knŭk kna Phạm Minh Chính leh anăn Khua bruă kƀĭn ala Vương Đình Huệ.