Hlăm aguah mbrue (8/11) ti Sang bi kƀĭn Êđăp Ênang ti ƀuôn prŏng phŭn Phnom Penh, khua knŭk kna Campuchia Hunssen kiă kriê leh klei drông khua knŭk kna Phạm Minh Chính lehanăn Êpul khua êmua ala čar Việt Nam nao čhưn kơ Campuchia. Leh knăm drông, dua čô khua knŭk kna mâo klei bi blŭ hrăm.

Êlâo anăn leh truh kơala čar Campuchia, Khua knŭk kna Phạm Minh Chính nao dưm leh kwang mnga ti knưng hnŭk êngiê, knưng ayang mtao Norodom Sihanouk, knưng hgŭm mbĭt Việt Nam – Campuchia ti ƀuôn prŏng phŭn. Hlăm hdră nao čhưn kơ Campuchia khua knŭk kna lŏ mâo dŭm bruă bi tuôm hŏng mtao Sihamoni, bi blŭ hrăm hŏng khua prŏng nah dlông Sei Čhum, bi tuôm hŏng khua bruă kƀĭn ala Heng Samrrin. Klei hiu čhưn anei dôk hlăm Thŭn hgŭm mbĭt Việt Nam – Campuchia 2022, đru mđĭ hĭn klei bi mguôp jăk siam Việt Nam – Campuchia mâo leh mơ̆ng đưm./.