Tlam hruê 31/10, Khua knŭk kna Phạm Minh Chính drông leh Kasper Rorsted, Khua knơ̆ng êpul group Adidas dôk mâo gưl čhưn, mă bruă ti Việt Nam. Knŭk kna Việt Nam srăng mkra mlih wăl anôk duh bi liê, mnia mblei, klei ngă hră m’ar, mđing dlăng, mjing djăp klei găl čiăng kơ phung duh bi liê lehanăn Adidas krơ̆ng kjăp, pŏk mlar hdră mă bruă ti Việt Nam.

Khua knŭk kna akâo kơ Adidas lŏ pŏk mlar hdră mkra mjing, mnia mblei mnơ̆ng ti Việt Nam – sa wăl anôk h’ĭt kjăp, sui thŭn mơ̆ng Êpul group, mbĭt anăn đru, mjing klei găl kơ anôk bruă duh mkra Việt Nam dưi nao hgŭm hlăm hdră mkăp mnơ̆ng dhơ̆ng kơ tar rŏng lăn. Kasper Rorsted hưn mdah leh boh tŭ bruă mnia mblei ti Việt Nam, mbĭt anăn brei thâo Adidas srăng mđĭ hdră ngă bruă ti Việt Nam kñăm mkăp mnơ̆ng kơ tar rŏng lăn mơ̆ng Êpul group./.