Hlue si klei hưn mdah, truh ară anei, Phŭn bruă kriê dlăng bruă knuă bi leh klei hưn mdah ksiêm wĭt Hdră mtrŭn 18-NQ/TW; Hdră bi mŭt, ba jao bruă klam, mkŏ mjing êpul mă bruă leh anăn hră mơar djŏ tuôm, hŏng hdră bruă mjưh ruê̆ bruă ngă Anôk dlăng bruă knuă druh Đảng, mkŏ mjing bruă Đảng Knŭk kna, bruă Đảng phŭn bruă, anôk bruă bi knar hŏng Phŭn bruă, anôk bruă hlăm Knŭk kna. Dŭm êpul bruă leh mkŏ dăp, bi mguôp bi hrŏ mơ̆ng 35 truh 40% anôk phŭn; dŭm êpul bruă lŏ mkŏ dăp hlăm lam snăn hrŏ ƀiă êdi 15%.

Klă klơ̆ng lui dŭm anôk bruă leh anăn êpul bruă bi knar; tal êlâo mĭn tĭng bi hrŏ 500 anôk bruă hlăm Phŭn bruă, dŭm Knơ̆ng bruă. Blŭ hrăm hlăm klei bi kƀĭn, Khua knŭk kna Phạm Minh Chính mñă klă, bruă mkŏ dăp bi mguôp leh anăn mkŏ mjing êpul mă bruă si ngă čiăng khuăt, ngă bruă tŭ dưn mguôp hŏng klei bi mlih leh anăn mđĭ hnơ̆ng jăk êpul knuă druh, phung mă bruă knŭk kna. Hlăm klei bi khuăt êpul mă bruă brei mkŏ mjing, čih mkra klei dưi dưn hdră êlan sa anăn, mâo klei lŏ čuê hdră êlan mơ̆ng êlâo truh ară anei. Boh nik, hŏng ênoh mnuih mă bruă hlue si hră kuôl kă, Khua knŭk kna mtă brei mâo hdră êlan djŏ guôp, amâo brei phung mă bruă hlue si hră kuôl kă luč liê.