Anôk bruă sang čư̆ êa čar Dak Lak mrâo ba mdah Hdră mtrŭn mrô 12032 kơ bruă lŏ wĭt mkŏ dăp anôk bruă hlăm Knơ̆ng bruă sang čư̆ êa čar, Knơ̆ng bruă sang čư̆ êa gưl kdriêk kñăm mkŏ mjing anôk bruă kriê dlăng knŭk kna tŭ dưn, mkăp djŏ hŏng klei čiăng mkra mlih bruă ngă hră mơar hlăm wưng mrâo. Hluê anăn, čar srăng bi mŭt mbĭt dŭm anôk bruă lehanăn mkra mlih hdră mkŏ dăp dŭm anôk bruă kñăm mđĭ boh tŭ dưn hdră kriê dlăng.

Klă klơ̆ng, Knơ̆ng bruă Hdră kčah – Duh bi liê hŏng Knơ̆ng bruă ngăn prăk bi mguôp mbĭt jing Knơ̆ng bruă Duh mkra – Ngăn prăk. Knơ̆ng bruă Ngăn dŏ – Wăl hdĭp mda hŏng Knơ̆ng bruă Lŏ hma mđĭ kyar krĭng ƀuôn sang bi mguôp mbĭt jing Knơ̆ng bruă Lŏ hma lehanăn Wăl hdĭp mda. Knơ̆ng bruă Rŭ mdơ̆ng lehanăn Knơ̆ng bruă Êlan klông dŭ mdiăng jing Knơ̆ng bruă Rŭ mdơ̆ng lehanăn Êlan klông. Knơ̆ng bruă Mnuih ngă bruă lehanăn Knơ̆ng bruă ksiêm dlăng mnuih ngă bruă, kahan êka êkeh lehanăn yang ƀuôn jing knơ̆ng bruă ksiêm dlăng mnuih mă bruă lehanăn Ngă bruă. Knơ̆ng bruă kreh knhâo – kdrăp mrâo lehanăn knơ̆ng bruă hâo hưn – mtô mblang jing Knơ̆ng bruă kreh knhâo kdrăp mrâo lehanăn mtô mblang. Čar ăt bi mguôp Sang mđung rup mđung asăp hŏng Hră klei mrâo Dak Lak jing Anôk bruă Hâo hưn mtô mblang čar Dak Lak, đru kơ anôk bruă anei ngă bruă hâo hưn ba wĭt boh tŭ dưn hĭn. Leh dưi bi mŭt lehanăn bi kruh, Dak Lak srăng hrŏ ƀiă êdi 9 knơ̆ng bruă, đru bi khuăt anôk bruă, mđĭ boh tŭ hdră kriê dlăng knŭk kna./.