Tlam 24/12, ti Sang bruă kƀĭn ala, Khua Anôk bruă kƀĭn ala Trần Thanh Mẫn gĭt gai Klei bi kƀĭn mơ̆ng Dhar bruă gĭt gai Anôk bruă kƀĭn ala  brei klei blŭ ksiêm dlăng, bi mklă dŭm bruă djŏ tuôm kơ hdră ngăn prăk, mâo: thiăm mbŏ mâo mta kñăm mơ̆ng ngăn prăk Gưl dlông kơ dŭm alŭ wăl čiăng hluê ngă hdră mtrŭn yang ƀuôn mâo Gưl dlông ba mtrŭn hlăm thŭn 2023 - 2024 lehanăn đru tĭng tla kơ ênoh phung nai mtô mâo ruah leh kơ thŭn 2022 - 2023; thiăm mbŏ mâo mta kñăm mơ̆ng ngăn prăk Gưl dlông kơ dŭm alŭ wăl hluê ngă Hdră mđĭ hĭn bruă kriê dlăng hŏng lăn ala phŭn agha jing anôk ngă bruă lŏ hma dliê kmrơ̆ng ară anei mâo dŭm anôk bruă lŏ hma, dliê kmrơ̆ng mkăn, dŭm gŏ sang, mnuih dôk ba yua; hnơ̆ng jia răng mgang wăl hdĭp mda hŏng êa săng, êa pui hlăm thŭn 2025.

Hluê anăn, Dhar bruă gĭt gai Anôk bruă kƀĭn ala tŭ ư ba mdah Hdră mtrŭn dưi brei bi tai wưng hluê ngă Hdră mtrŭn mrô 09 hŏng ênoh bi liê tuič hnơ̆ng êjai jing 1,44% ênoh đăo tĭng hrui, bi liê kơ ênua mdrao mgŭn, ênua luič bruă mă lehanăn wưng bi tai truh kơ jih hruê 30/6 /2025. Dhar bruă gĭt gai Anôk bruă kƀĭn ala ăt mtă, anei jing hdră msir čiăng rơ̆ng hdră kriê dlăng, ênua yang ƀuôn hlăk ka mâo hdră mtrŭn mrâo lehanăn dôk hluê ngă hdră bi khuăt anôk bruă, mkŏ mjing anôk bruă Ênua yang ƀuôn Việt Nam hluê Hdră mtrŭn mrô 18./.