Dhar bruă gĭt gai bruă kƀĭn ala hưn leh kơ hdră êmuh lehanăn wĭt lač klei êmuh hlăm klei bi kƀĭn anei. Mâo ruah jing bruă rŭ mdơ̆ng, bruă kiă kriê bruă knuă mă, bruă hâo hưn, bruă ksiêm dlăng. Êpul dưi êmuh tal êlâo jing hlăm bruă rŭ mdơ̆ng, mâo khua phŭn bruă Nguyễn Thanh Nghị wĭt lač kơ bruă čuăl mkă lehanăn kiă kriê klei mđĭ kyar ƀuôn prŏng ti Việt Nam, boh nik hlăm dŭm ƀuôn prŏng, p’prŏng.

Êpul tal dua kơ bruă hâo hưn, Khua phŭn bruă hâo hưn Nguyễn Mạnh Hùng wĭt lač kơ klei ba yua kdrăp mrâo mrang hlăm bruă knŭk kna kiă kriê, mkŏ mjing knŭk kna mrô, bruă sang čư̆ êa mrô. Êpul tal 3 jing: Kơ klei kiă kriê bruă knuă mă, mâo khua phŭn bruă kiă kriê bruă knuă Phạm Thị Thanh, wĭt lač kơ bruă mkŏ mjing êpul mnuih ngă bruă, bi hrŏ mnuih ngă bruă, mđĭ mlih klei kơ prăk mlan mnuih ngă bruă. Êpul tal 4: Hlăm bruă ksiêm dlăng, Khua knơ̆ng kiă kriê bruă ksiêm dlăng mơ̆ng knŭk kna Đoàn Hồng Phong wĭt lač kơ bruă mđĭ hĭn klei ksiêm dlăng, gang mkhư̆ bi pral klei ngă soh hŏng hdră bhiăn. Knhal ruĕ klei êmuh, Khua knŭk kna Phạm Minh Chính srăng bi mngač jih jang klei djŏ tuôm hŏng klei êmuh lehanăn wĭt lač mơ̆ng phung bi ala bruă kƀĭn ala./.