Klei kƀĭn trông kñăm bi klă hdră mtrŭn mrô 23 mơ̆ng phŭn bruă kđi čar kơ bruă mđĭ kyar krĭng Lăn Dăp Kngư, hlăm anăn kñăm kơ 3 mta phŭn: Rang mdah, hưn mdah rup, krĭng lăn, dhar kreh, anak mnuih leh anăn hưn mdah boh mnga bruă lŏ hma hlăm krĭng. Hưn mdah hdră ngă bruă mơ̆ng knŭk kna hluê ngă hdră mtrŭn mrô 23 mơ̆ng phŭn bruă kđi čar, mđĭ klei duh bi liê ti krĭng Lăn Dăp Kngư. Hlăm klei kƀĭn, phung bi ala mâo lu klei blŭ bi trông, bi êdah bruă klam, ai tiê leh anăn klei kčĕ, hưn mdah lu hdră êlan djŏ guôp, djŏ hŏng boh sĭt, hluê anăn bi êdah klei uêñ mĭn, sa ai čiăng mtrŭt mđĭ klei đĭ kyar hmar leh anăn kjăp ti krĭng Lăn Dăp Kngư, đru ba hdră mtrŭn mrô 23 mơ̆ng phŭn bruă kđi čar nao hlăm klei hdĭp, yang ƀuôn.

Leh hmư̆ dŭm klei blŭ bi trông, blŭ hrăm hlăm klei kƀĭn, Khua knŭk kna Phạm Minh Chính hlăk mblang leh dŭm klei ktang, klei găl bi tưn leh anăn dŭm klei dleh kpăk ti krĭng Lăn Dăp Kngư. Mbĭt anăn ktrâo klă dŭm mta kñăm, hdră kčah hdră ngă bruă mơ̆ng knŭk kna, hluê anăn bi êdah dŭm hnơ̆ng čoh čuăn msĕ si klei đĭ kyar RGDP kah knar mar hlăm brô 7 – 7,5%. Truh ti thŭn 2030, RGDP kah knar grăp čô mâo hlăm brô 130 êklai prăk, knar hŏng 5.000 USD. Hnơ̆ng ƀuôn prŏng mâo hlăm brô 37,2 – 40,7%, hnơ̆ng krĭng ƀuôn sang mrâo hlăm brô 85%.