Hưn hŏng Khua knŭk kna lehanăn Êpul mă bruă, Khua bruă sang čư̆ êa čar Lâm Đồng Trần Văn Hiệp brei thâo, thŭn 2022 khădah dôk dleh dlan, lông dlăng, ƀiădah bruă Đảng, sang čư̆ êa lehanăn mnuih ƀuôn sang Lâm Đồng ăt hgŭm mguôp, gĭr ktưn, dưi mâo boh tŭ dưn jăk siam hlăm djăp mta bruă, dưi ngă jih 18/18 hnơ̆ng čuăn mđĭ kyar bruă duh mkra – ala ƀuôn thŭn 2022, hlăm anăn êgao 6 hnơ̆ng čuăn.

Čar Lâm Đồng akâo hŏng knŭk kna, Khua knŭk kna, dŭm phŭn, dhar bruă gưl dlông dŭm bruă djŏ tuôm kơ hdră mkra anôk bruă nah gŭ: Đru kơ čar mkra êlan pral Bảo Lộc – Liên Khương; hnư mkra êlan pral Nha Trang – Liên Khương, Liên Khương – Ƀuôn Ama Thuôt lehanăn mđing kơ dŭm ktuê êlan mkŏ hŏng krĭng mkăn. Leh hmư̆ klei blŭ đru mguôp, klah čŭn knăm anei, Khua knŭk kna h’êč hmưi, bi mni kơ bruă Đảng, sang čư̆ êa, mnuih ƀuôn sang, anôk bruă duh mkra Lâm Đồng dưi mâo wưng êgao, boh nik hlăm thŭn 2022 dưi krŭ wĭt pral.

Hlăm wưng kơ anăp, Khua knŭk kna mtă kơ Lâm Đồng bi mlih gru hmô mđĭ kyar hluê hdră mrâo, mđĭ hnơ̆ng mâo boh mnga, ba yua kdrăp mrâo, boh nik hlăm bruă hiu čhưn ênguê, bruă nah tluôn, logistic, bruă lŏ hma… gĭr jing boh kdrŭt mđĭ kyar mơ̆ng kluôm krĭng Lăn dap kngư lehanăn kluôm ala.

Êlâo kơnăn, Khua knŭk kna Phạm Minh Chính leh anăn Êpul ngă bruă mơ̆ng knŭk kna nao čuă leh knơ̆ng bruă duh mkra duh mkra mnia mblei Dalat Hasfarm čiăng mkra mjing, mkăp brei knăt mjeh, mnga khăt adhan leh anăn tŏ mnga ti bo Đà Lạt. leh giăm 30 thŭn mkŏ mjing, mnơ̆ng 1 ha mnga hrah leh anăn 1 ha mnga cẩm chướng dưi plah hlăm dŭm boh sang ală kĭng dră hŏng ana đrao, ară anei Dalat Hasfarm rŭ mdơ̆ng leh sang ală kĭng hŏng msei leh anăn pŏk thiăm dŭm đang war pla mjing hŏng ênhă truh giăm 320ha, ară anei mâo giăm 4.000 čô mnuih mă bruă. Grăp thŭn Dalat Hasfarm mkăp brei kơ anôk mnia mblei 15 ala čar leh anăn alŭ wăl, lu hĭn jing Japon, hŏng ênoh giăm 60 êklăk USD. Ti nei, Khua knŭk kna mñă kơ Dalat Hasfarm lŏ dơ̆ng pŏk phai duh bi liê dŭm klei bi hmô alŭ wăl êngao ƀuôn prŏng, lŏ dơ̆ng uêñ mĭn, kriê dlăng klei hdĭp, ai tiê kơ mnuih mă bruă, đru kơ alŭ wlăl ngă jăk bruă bi hơĭt klei hdĭp yang ƀuôn…