Leh mkŏ mjing klei drông, dua čô khua knŭk kna mâo leh klei bi trông. Tinăn, Khua knŭk kna Phạm Minh Chính mâo klei mơak gưl tal êlâo truh kơ Luxembourg, lač jăk kơklei tŭdrông kdrăm k’ah, lehanăn jăk jĭn mâo knŭk kna Luxembourg mkŏ mjing leh hŏng êpul. Khua knŭk kna lač, Việt Nam mpŭ nanao klei mjĕ mgiăm hgŭm mbĭt kluôm dhuôm hŏng Luxembourg, sa lăn čar mâo bruă klam yuôm bhăn hlăm Êpul hgŭm Ơrôp EU, kkuh čhưn klei drông Khua knŭk kna Phạm Minh Chính nao čhưn kơ Luxembourg, anei jing gưl hiu čhưn tal êlâo êdei kơ 10 thŭn plah wah dua ala čar, khua knŭk kna Xavier Bettel lač anei jing mmông myun lŏ hyuă kjăp hĭn klei bi mguôp dua nah hlăm wưng mđĭ kyar mrâo.

Dua čô khua bi mni kơ dŭm bruă hgŭm mâo leh, lehanăn lŏ dơ̆ng ksiêm duah mkŏ mjing klei bi mguôp mrâo jăk hĭn hŏng klei găl kơ klei mđĭ kyar dua ala čar. Bi tŭ ư klei hgŭm mđĭ kyar mtah, dưn yua klei ktang mơ̆ng Luxembourg kơprăk duh bi liê, đru kơ Việt Nam hlue ngă hdră êlan mđĭkyar doh, lehanăn mdrơ̆ng hŏng klei bi mlih yan adiê, hlăm anăn mâo bruă hlue ngă klei ƀuăn mâo leh ti anôk bi kƀĭn COP 26./.