Hlăm tlam 28/11, ti Anôk bruă Knŭk kna, Khua knŭk kna Phạm Minh Chính bi trông leh hlăm đĭng blŭ hŏng Khua knŭk kna Prăng Elisabeth Borne čiăng bi trông dŭm hdră mđĭ ktang klei bi hgŭm hdră bruă Việt Nam - Prăng, boh nik hlăm bruă bi hgŭm bruă duh mkra, mnia blei, duh bi liê, mđing kơ klei bi hdơr 50 thŭn mkŏ mjing klei bi hgŭm bruă hŏng tač êngao Việt Nam - Prăng leh anăn 10 thŭn bi hgŭm bruă hlăm thŭn 2023. Dua Khua knŭk kna bi mklă klei bi hgŭm bruă duh mkra jing bruă klam phŭn hlăm klei bi hgŭm Việt Nam - Prăng, kah mbha leh anăn bi trông oĭk ngă dŭm hdră bi hgŭm bruă duh mkra phŭn hlăm klei bi hgŭm dua ala čar, boh nik hdră bruă ktuê êlan êdeh treng ƀuôn prŏng Nhổn - kdrŭn êdeh treng Hà Nội, hnưm dưi bi leh êlâo kơ knhal jih thŭn anei.

Khua knŭk kna Prăng Elisabeth Borne čang hmăng mđĭ ktang klei bi hgŭm hŏng Việt Nam hlăm bruă duh mkra mrô, anôk bruă nah gŭ leh anăn êa pui êwa čuh mkra mjing, bi tŭ ư pŏk ngă djăp ênŭm, tŭ dưn čiăng ba yua dŭm klei găl prŏng prĭn mơ̆ng Klei kuôl kă bruă mnia blei êngiê Việt Nam - EU (EVFTA).  Khua knŭk kna Phạm Minh Chính akâo kơ Prăng mjing klei găl kơ dŭm mta mnŏng dhŏng hlue si yan mơ̆ng Việt Nam dưi ba čhĭ ti Prăng, mbĭt anăn mtă kơ Prăng hnưm bi mklă klei kuôl kă rang mgang duh bi liê EU - Việt Nam (EVIPA) kñăm mjing klei mđĭ kyar bruă bi hgŭm dua nah leh anăn mtrŭt Knơ̆ng bruă Ơ Rôp (EC) hnưm lăm lui hră kñĭ hŏng kan hdang Việt Nam.