Mâo êbeh 25 êbâo čô mnuih Việt Nam dôk hluê hriăm, hdĭp mda, mă bruă, mâo klei hdĭp hơĭt ti Belanda leh anăn mâo bruă sang čư êa alŭ wăl yap yuôm bhăn. Khua knŭk kna yap yuôm bhăn dŭm boh tŭ dưn mơ̆ng êpul êya mnuih Việt Nam ti Belanda – jing sa êpul êya prŏng ti Ơrôp. Mnuih ƀuôn sang bi mguôp, jing kdrông mkŏ yuôm bhăn, đru hưn mdah leh anăn ba mnơ̆ng dhơ̆ng mơ̆ng Việt Nam truh kơ anôk mnia mblei Belanda leh anăn dŭm ala čar Ơrôp mkăn.

Hơ̆k mơak kyua mnuih ƀuôn sang dưi mkŏ mjing leh Êpul hgŭm mnuih Việt Nam ti Belanda, Khua knŭk kna hmăng hmưi lŏ dưi mkŏ mjing thiăm dŭm êpul mkăn msĕ si êpul phung mnia mblei, kreh knhâo, ksiêm duah… Hưn hŏng mnuih ƀuôn sang kơ bruă răng mgang, mkŏ mjing, mđĭ kyar ala čar, Khua knŭk kna brei thâo, ară anei hnư hrui wĭt kah knar grăp čô ti Việt Nam mâo leh giăm 4.000 USD leh anăn GDP đăo knăl mâo 400 êklai USD. Ala čar drei ka tuôm mâo ôh klei găl, ai ktang, k’hưm leh anăn klei đăo knang tar rŏng lăn msĕ ară anei.