Khua knŭk kna hưn mthâo leh kơ mnuih ƀuôn sang boh tŭ klei bi kƀĭn tal 8 lehanăn hdră duh mkra ala ƀuôn mơ̆ng lăn čar wưng êgao, hdră mlih mrâo, mkŏ dăp anôk bruă kđi čar, bi hrŏ ênoh mnuih mă bruă mguôp hŏng hdră mkŏ dăp, mđĭ hnơ̆ng tŭ mă bruă, ba yua tŭ dưn êpul knuă druh, mnuih mă bruă; bi hrŏ ênoh bi liê nanao lehanăn đru mguôp mkra mđĭ prăk mlan.

Mbĭt anăn, Khua knŭk kna ăt mblang klei êmuh mơ̆ng mnuih ƀuôn sang msĕ si: Klei kơ anôk bruă êlan klông, boh nik êlan êran pral Dưr – Dhŭng, Êlan treng êran pral Dưr – Dhŭng, hdră mtrŭn hŏng mnuih mâo bruă tŭ dưn, hdră mdrơ̆ng hŏng klei êngăp êa, răng mgang phŭn êa krĭng Dap mnai êa krông Cửu Long. Khua knŭk kna mñă, ară anei knŭk kna lehanăn dŭm alŭ wăl dôk pŏk kjăp dŭm hdră msir čuăl mkă ênŭm 1 êklăk ha lăn čiăng pla 1 êklăk ha mdiê, mkra anăn knăl mdiê braih Việt Nam hing ang tar rŏng lăn, bi lu jơr wăl anôk ngă bruă, đru kdrăp mrâo, kreh knhâo, ba yua hdră mlih mrô./.