Hlăm dŭm klei bi tuôm gưl dlông, 2 tĭng bi tŭ ư ba klei mjĕ giăm jăk siam, klei bi hgŭm knhuah gru, bi mguôp kluôm ênŭm, hơĭt kjăp plah wah Việt Nam – Campuchia lŏ dơ̆ng nao êlam hĭn, kyua klei tŭ kơ mnuih ƀuôn sang 2 ala čar. Khua bruă kbĭn ala Heng Samrin bi mni kơ boh tŭ klei blŭ hrăm êlâo anăn plah wah Khua knŭk kna leh anăn bruă 2 tĭng bi klă 11 hră mơar bi mguôp hlăm wưng anei, yap yuôm bhăn klei bi mguôp plah wah 2 knŭk kna Việt Nam leh anăn Campuchia hlăm dŭm mta bruă, boh nik jing bruă kpơ̆ng gơ̆ng knông lăn.

Khua knŭk kna Phạm Minh Chính mñă klă bruă ksul mbŭ leh anăn amâo mâo mdei bi kjăp klei mjĕ giăm, klei bi mguôp kluôm ênŭm Việt Nam – Campuchia jing hdră čoh čuăn kơ 2 ala čar. Khua knŭk kna hmăng hmưi Bruă kƀĭn ala, knŭk kna Campuchia lo dơ̆ng uêñ mĭn, sa ai hŏng bruă mtrŭt mđĭ klei bi mguôp bruă duha mkra plah wah 2 ala čar, djŏ guôp hŏng klei găl leh anăn klei mjĕ giăm jăk siam plah wah 2 ala čar.