VOV4.Êđê -  Hruê mbruê 18/10, Khua knŭk kna Phạm Minh Chính mâo leh klei blŭ hrăm êlan đĭng blŭ hŏng Khua knŭk kna Australia Anthony Albanese čiăng bi trông kơ dŭm hdră êlan mđĭ hĭn klei mjĕ giăm 2 ala čar, boh nik jing mtrŭt mđĭ klei bi mguôp bruă duh mkra – mnia mblei – duh bi liê, mđĭng truh bi hdơr 50 thŭn hruê mkŏ mjing klei mjĕ giăm 2 ala čar ti thŭn 2023. Khua knŭk kna Phạm Minh Chính leh anăn Khua knŭk kna Anthony Albanese lŏ bơ̆k bâo kơ dŭm klei đĭ kyar jăk siam leh anăn mâo boh tŭ dưn hlăm klei mjĕ dua ala čar hlăm wưng êgao.

Dua čô Khua knŭk kna yap yuôm bhăn bruă 2 ala čar rơ̆ng klei bi trông êpul, bi tuôm gưl dlông, hlăm anăn mâo bruă mprăp kơ klei nao čuă gưl dlông truh ti Australia anăp anei mơ̆ng Khua bruă kƀĭn ala Vương Đình Huệ. Khua knŭk kna Phạm Minh Chính mñă kơ Australia đru kơ klei ngă bruă leh anăn pŏk hĭn anôk mnia mblei boh kroh leh anăn kan hdang mơ̆ng Việt Nam. Khua knŭk kna Phạm Minh Chính ăt lŏ mñă kơ Australia mtrŭt mjhar dŭm knơ̆ng bruă mơ̆ng Australia duh bi liê lu hĭn kơ Việt Nam.

VOV/ Pô mblang: Y-Bel Êban