Ti anôk čhưn anăn, Khua knŭk kna mơak ƀuh klei bi hgŭm dua nah đuĕ nao hlăm hdră êlan kluôm dhuôm Việt Nam – Japon mâo leh klei đĭ kyar jăk, tŭ jing, hlăm djăp mta bruă, mâo klei bi đăo knang hlăm bruă kđi čar. Japon lŏ dơ̆ng jing ala čar duh mkra yuôm bhăn hŏng Việt Nam, jing pô đru ODA lehanăn jing pô hgŭm mnuih ngă bruă prŏng hĭn, pô duh bi liê dôk tal sa, pô mnia mblei lehanăn hiu čhưn ênguê tal 4 hŏng Việt Nam.

Wưng tinăp, čiăng kơ bruă bi hgŭm kluôm dhuôm anei kjăp nanao plah wah Việt Nam – Japon hlăm klei mtrŭn agha êlam hĭn, klă mngač, lehanăn kluôm ênŭm hĭn. Khua knŭk kna Phạm Minh Chính čang hmăng kơ čar Yamaguchi mâo klei bi hgŭm kjăp hŏng čar Bình Dương lehanăn dŭm alŭ wăl mkăn ti Việt Nam hlăm klei duh mkra mnia mblei, mtrŭt mđĭ phung duh mkra hlăm čar pŏk mlar klei duh bi liê, blei lu mnơ̆ng mơ̆ng Việt Nam.