VOV4.Êđê - Ti Anôk bruă Knŭk kna, Khua knŭk kna Phạm Minh Chính drông leh Khua mil čhil Singapore Halimah Yacob dôk čhưn gưl knŭk kna ti Việt Nam. Khua mil čhil Halimah Yacob bi mklă Singapore dlăng myuôm klei đĭ kyar bi hgŭm yuôm bhăn hŏng Việt Nam.

Kơ klei bi hgŭm dua ala čar, Khua knŭk kna mtă kơ dua tĭng bi hgŭm pŏk ngă tŭ dưn dŭm hră mơar mrâo bi siñê hlăm gưl nao čhưn, đru pŏk ngă tŭ dưn dŭm bruă bi hgŭm plah wah dua ala čar kơ êa pui êwa čuh, klei êđăp ênang internet, wăl hdĭp mda, bruă sang hră - mtô bi hriăm, mđĭ kyar mnuih mă bruă, mbĭt anăn mtă kơ dua ala čar truh kơ bruă mkŏ mjing “Klei bi hgŭm ƀĭng hgŭm bruă duh mkra mrô - bruă duh mkra mtah Việt Nam - Singapore”.  Kơ dŭm bruă krĭng wăl leh anăn quốc tế, dua khua gĭt gai bi tŭ ư lŏ dơ̆ng bi hgŭm tliêr kjăp čiăng mđĭ lar klei bi hgŭm, bruă klam mơ̆ng ASEAN; mđĭ lar klei mĭn mbĭt mơ̆ng ASEAN hlăm bruă Êa ksĭ Ngŏ. Dua khua gĭt gai bi tŭ ư mđĭ hĭn dŭm bruă mâo klei găl mơ̆ng klei bi hgŭm bruă duh mkra, mnia blei hlăm ASEAN, mơ̆ng anăn mđĭ hĭn klei bi hgŭm dŭm bruă mkăn./.

VOV/Pô Mblang: H’Zawut