Mơ̆ng sa ala čar mâo ênoh tlŏ ƀiă, Việt Nam bi mlih boh klei, jing sa hlăm 6 ala čar mâo ênoh luôm vaccin lu hĭn. Khua knŭk kna Phạm Minh Chính mñă klă, truh ară anei, drei dưi ktuê dlăng leh klei ruă Covid-19, bi ala kơ Knŭk kna, Khua knŭk kna bi mni, čih yap leh anăn bi mni klei đru mguôp mơ̆ng bruă duah vaccin, đru mguôp hlăm hdră gang mkhư̆ klei ruă tưp.

Khua knŭk kna lač klă, hlăm wưng kơ anăp, klei ruă Covid-19 ăt ka jih, dleh ktuê dlăng rŏng lăn. Drei amâo dưi ngă ngơi mang ôh, lŏ dơ̆ng gĭr gang mkhư̆ klei ruă tưp, mđing ktuê dlăng klei ruă Covid-19 leh anăn dŭm klei ruă mkăn. Kyua anăn, brei drei lŏ dơ̆ng duah vaccin mơ̆ng tač êngao, dưi blei vaccin ăt jing kyua bruă hŏng tač êngao. Khua knŭk kna lač klă, brei mđĭ ktang kdrăp mrâo čiăng dưi mkra mjing vaccine.