Bi trông hlăm klei kƀĭn, lu phung bi ala mâo leh klei bi trông klă mngač, mkŏ mjing, mâo lu klei blŭ đru mguôp yuôm bhăn, mâo bruă đua klam leh anăn ba mdah dŭm klei kčĕ, klei akâo kơ lu hdră êlan djŏ guôp, djŏ hŏng boh sĭt. Bi kơ bruă klam, hdră êlan klă klơ̆ng, Khua knŭk kna Phạm Minh Chính ktrâo klă 5 êpul bruă klam, hdră êlan, hlăm anăn mñă ktang: Mđĭ hĭn, bi sa ai klei mĭn kơ ƀuôn prŏng, bruă klam, kơhưm mơ̆ng ƀuôn prŏng hlăm klei đĭ kyar mbĭt. Klei mĭn gĭt gai mbĭt jing bi sa ai klei yuôm bhăn hlăm kluôm ala, boh nik hlăm dŭm alŭ wăl leh anăn dŭm anôk bruă djŏ tuôm kơ bruă klam, kơhưm mơ̆ng ƀuôn prŏng – jing tur knơ̆ng yuôm bhăn čiăng bi sa ai klei ngă bruă.

Knŏng mlih mrâo klei mĭn, hyuă kjăp klei mĭn klă mngač kơ ƀuôn prŏng kơh drei mâo klei đăo knang, bruă klam leh anăn klei ngă bruă sa ai čiăng mđing truh kơ boh tŭ msĕ hŏng klei hmăng hmưi. Khua knŭk kna đăo knang hŏng klei gĭr ktưn leh anăn klei ngă bruă ktang phĭt hlăm kluôm bruă kđi čar, dŭm gưl bruă, dhar bruă leh anăn klei sa mơ̆ng phung mah jiăng tar rŏng lăn, hlăm wưng kơ anăp, dŭm ƀuôn prŏng ti Việt Nam srăng dưi đĭ kyar ktang leh anăn kdlưn hĭn.