Hlăm grăp klei kƀĭn trông, Phung khua gĭt gai ASEAN leh anăn ƀĭng hgŭm mâo leh klei ksiêm wĭt leh anăn ba mdah hdră tă đĭ kyar klei mjĕ giăm 2 tĭng. Phung ƀĭng hgŭm mñă klă dlăng yuôm bhăn klei mjĕ giăm hŏng ASEAN, ƀuăn rơ̆ng hrăm mbĭt hŏng ASEAN mtrŭt mđĭ klei blŭ hrăm, bi mguôp, bi mdrơ̆ng hŏng dŭm klei lông dlăng, đru mkŏ wĭt alŭ wăl pŏk, kluôm ênŭm, klă mngač, dlăng yuôm bhăn klei bhiăn tar rŏng lăn, hŏng ASEAN jing mta kñăm.

Hlăm klei kƀĭn trông gưl dlông ASEAN – China tal 25, Khua knŭk kna China mñă klă, ASEAN jing ƀĭng hgŭm tal êlâo hĭn hlăm hdră jĕ giăm pô, lŏ mñă klă mpŭ kơ bruă klam jing mta kñăm mơ̆ng ASEAN hlăm alŭ wăl, hmăng hmưi mbĭt hŏng ASEAN hluê ngă tŭ dưn klei bi mguôp kluôm ênŭm mrâo mkŏ mjing, ƀuăn srăng đru kơ ASEAN mkŏ mjing êpul êya leh anăn bi lar bruă klam hlăm dŭm klei kƀĭn alŭ wăl leh anăn tar rŏng lăn. Bi ruê̆ klei kƀĭn, khua gĭt gai dŭm ala čar ASEAN leh anăn China bi klă knăm bi hdơr 20 thŭn hruê bi klă klei ngă bruă mơ̆ng dŭm tĭng ti ksĭ Ngŏ (DOC), lŏ mñă klă klei yuôm bhăn leh anăn boh tŭ dưn mơ̆ng DOC hŏng klei êđăp ênang, hơĭt kjăp ti ksĭ Ngŏ. Klei bi klă mđĭ kyar mđĭ leh anăn kjăp, klei bi klă mbĭt kơ bruă bi mguôp bi mâo djăp mnơ̆ng ƀơ̆ng huă.