Tač êdeh phiơr Gia Bình jing bruă mkŏ mkra hdră êlan kơ klei êđăp ênang – bruă lĭng kahan, đru kơ bruă gĭt gai, ktrâo lač mơ̆ng êpul kahan ksiêm yang ƀuôn. Hdră mâo hnơ̆ng prŏng, mâo mta kñăm čuăl mkă, hdră mkŏ mjing, bi êdah klei thơ̆ng kơ bruă, truăn kơ bruă, mrâo mrang mơ̆ng êpul kahan ksiêm yang ƀuôn, êpul kahan knhăk. Boh nik hdră mâo boh tŭ dưn hƀuê ênuk, hluê ngă hdră mtrŭn mrô 12 mơ̆ng Phŭn bruă kđi čar, gru kruăk ba êpuk kahan knhăk jing mrâo mrang.

Blŭ hrăm hlăm hdră, Khua knŭk kna Phạm Minh Chính mñă klă, kahan ksiêm yang ƀuôn jing êpul kmeh gơ̆ng ngă bruă klam răng mgang klei êđăp ênang lăn čar, răng mgang klei êđăp ênang yang ƀuôn, bi kdơ̆ng hŏng phung ngă soh leh anăn dŭm mta bruă soh hŏng hdră bhiăn lăn čar, klei êđăp ênang yang ƀuôn. Hlăm boh klei mrâo, rŭ mjing tač êdeh phiơr Gia Bình jing sa kdrêč bi mâo djăp klei čiăng mkŏ mjing êpul kahan ksiêm mrâo mrang hlăm boh klei mrâo leh anăn srăng rŭ mjing tač êdeh phiơr Gia Bình hŏng hdră ba yua lu mta. Khua knŭk kna mñă kơ Phŭn bruă kahan ksiêm rŭ mdơ̆ng ngă bruă hŏng ai tiê 3 hĭn: ngă bruă hmar hĭn, hnơ̆ng jăk hĭn, ênoh êlưih hĭn leh anăn hlăm wang 18 mlam srăng bi leh hdră.