Khua knŭk kna lač klă, mbĭt hŏng klei ñŭ kma hlăm lu mta bruă, bi mguôp bruă lĭng kahan Việt Nam hŏng dŭm ala čar mâo nanao Đảng, knŭk kna Việt Nam uêñ mĭn, rơ̆ng, mtrŭt mđĭ leh anăn đĭ kyar.

Hŏng mta kñăm mtrŭt mđĭ klei ñŭ kma tar rŏng lăn, mđĭ hĭn klei blŭ hrăm bruă lĭng kahan, mđĭ klei đăo knang plah wah Việt Nam leh anăn dŭm ala čar dlông rŏng lăn, mtrŭt mđĭ klei bi mguôp kdrăp yua bruă lĭng kahan, Klei rang mdah bruă lĭng kahan Việt Nam thŭn 2022 jing mmông găl čiăng kơ phung čuăl mkă hdră êlan bruă lĭng kahan, dŭm knơ̆ng bruă lĭng kahan, klei êđăp ênang bi tuôm, kah mbah, mđĭ kyar, bi mguôp mđing truh kơ sa rŏng lăn êđăp ênang, bi mguôp leh anăn đĭ kyar mdrŏng sah.

Klei rang mdah anei dưi iêo mthưr êbeh 170 knơ̆ng bruă lĭng kahan mơ̆ng 30 ala čar leh anăn dŭm phŭn, dhar bruă Việt Nam mbĭt hŏng 250 êpul tue mơ̆ng ala tač êngao leh anăn hlăm ala čar nao hgŭm, rang mdah dŭm mta mnơ̆ng dhơ̆ng bruă lĭng kahan. Klei anăn brei ƀuh klei uêñ mĭn leh anăn klei khăp mơ̆ng dŭm ala čar, dŭm êpul êya brei kơ Việt Nam leh anăn lĭng kahan yang ƀuôn Việt Nam.