Kdrŭn anei, mkŏ mjing ti kjhuôč Phú Lợi, mbah krông Cái Mép - Thị Vải, kdriêk Cần Giờ, hŏng boh prŏng hlăm brô 571 ha lehanăn boh prŏng êlah êa hlăm brô 477 ha; ênoh bi liê jih jang êbeh 5 êklai USD.  Alŭ wăl hiu čhưn ênguê ksĭng êa ksĭ ti Cần Giờ mâo boh prŏng truh 2.870 ha, hŏng ênoh duh bi liê êbeh 217.000 êklai prăk. Leh ksiêm dlăng, Khua knŭk kna mâo leh mmông ngă bruă hŏng phung khua kiă kriê dŭm phŭn dhar bruă gưl dlông lehanăn ƀuôn prŏng Hồ Chí Minh kñăm mâo hdră rŭ mkra alŭ wăl anei pral lehanăn kjăp.

Khua knŭk kna Phạm Minh Chính mtă kơ ƀuôn prŏng Hồ Chí Minh mkŏ mjing mtam hdră rŭ mkra ƀuôn prŏng, thiăm mbŏ, bi leh klei čuăl mkă mđĭ kyar kdriêk Cần Giờ, dôk hlăm hdră mđĭ kyar kluôm ƀuôn prŏng. Hlăm anăn mâo alŭ wăl ksĭng êa ksĭ, mâo ngă mtam bruă rŭ mkra đru bi kjăp wăl hdĭp mda, lehanăn dăp anôk dôk kơ mnuih ƀuôn sang đuĕ mơ̆ng wăl rŭ mkra hŏng klei.