Mlam mmăt mbrue (2/11), ti sang bi kƀĭn ala čar, Khua knŭk kna Phạm Minh Chính nao lehanăn blŭ hrăm ti knăm bi êdah mnơ̆ng djăp anăn knăl ala čar Việt Nam tal 8, thŭn 2022. Anei jing bruă yuôm bhăn kñăm mpŭ mni dŭm anăn knăl mnơ̆ng dhơ̆ng djăp ênoh čuăn, mâo k’hưm, năng lŏ mđĭ bi lar hlăm phung duh mkra mnia mblei Việt Nam, lehanăn hlăm klei duh mkra, đru lŏ mđĭ anăn knăl mnơ̆ng Việt Nam knư̆ hrue knư̆ jing jĕ giăm, mâo k’hưm jăk hlăm klei bi mnia mblei hlăm ala čar lehanăn hŏng ala tač êngao.

Leh 20 thŭn ngă klei anei phung duh mkra mâo mnơ̆ng dhơ̆ng djăp ênoh čuăn anăn knăl ala čar đĭ nanao hlăm grăp thŭn, mơ̆ng 30 phung duh mkra hlăk thŭn 2008, đĭ leh truh 172 phung duh mkra thŭn 2022.172 phung duh mkra djăp anăn knăl mnơ̆ng ala čar thŭn anei jing mnơ̆ng jăk êdi mâo bi klă leh hlăk thŭn 2021 truh hlăm brô 1 êbâo 570 êklai prăk, ba jao ngăn prăk kơ knŭk kna giăm 129 êbâo êklai prăk, mjing bruă knuă mă kơ giăm 600 êbâo čô mnuih, hlue ngă jăk djăp hdră êlan kơ klei hdĭp mda ala ƀuôn. Bi ala kơ Đảng, knŭk kna, Khua knŭk kna bi mni kơ 172 phung duh mkra mâo mnơ̆ng djăp ênoh čuăn thŭn anei. Lehanăn lŏ mñă bruă mkŏ mjing anăn knăl djăp ênoh čuăn ala čar jing bruă klam kdrưh k’ăm mơ̆ng êpul phung duh mkra Việt Nam./.