Aguah mbruê 14/11, Phŭn bruă hdră êlan leh anăn duh bi liê mkŏ mjing klei kƀĭn bruă klei mrâo kơ Klei kƀĭn trông hluê ngă hdră mtrŭn mrô 23-NQ/TW mơ̆ng Phŭn bruă kđi čar kơ hdră êlan mđĭ kyar bruă duh mkra ala ƀuôn, rơ̆ng klei êđăp ênang krĭng Lăn Dăp Kngư truh ti thŭn 2030 srăng dưi mkŏ mjing ti ƀuôn prŏng Đà Lạt, čar Lâm Đồng. Hluê anăn, klei kƀĭn trông anei srăng mkŏ mjing hruê 20/11, ti gŭ klei gĭt gai mơ̆ng Khua knŭk kna Phạm Minh Chính.

Hŏng akŏ “Đĭ kyar mtah – bi kna - kjăp”, anei jing klei kƀĭn 3 hlăm 1, dưi mkŏ mjing hŏng mta kñăm ba mdah hdră ngă bruă mơ̆ng knŭk kna hluê ngă hdră mtrŭn mrô 23 kơ hdră êlan mđĭ kyar bruă duh mkra ala ƀuôn, rơ̆ng klei êđăp ênang krĭng Lăn Dăp Kngư truh ti thŭn 2030, tă hdră truh ti thŭn 2045. Mbĭt anăn lŏ mtrŭt mđĭ klei duh bi liê, iêo mthưr klei uêñ mĭn mơ̆ng phung dih bi liê, êpul hgŭm dŭm knơ̆ng bruă hlăm ala čar, ala tač êngao, phung hgŭm mđĭ kyar hrăm mbĭt hŏng knŭk kna hlăm klei ngă hdră, hdră duh bi liê mâo boh tŭ yuôm bhăn hŏng klei đĭ kyar bruă duh mkra – ala ƀuôn krĭng Lăn Dăp Kngư.