Khua knŭk kna Phạm Minh Chính mâo leh mmông tŭ drông Đại tướng Vilay Lakhamphong, Khua hlăm phŭn bruă kđi čar, K’kiăng Khua knŭk kna, Khua phŭn bruă kahan ksiêm Lào ba anăp phŭn bruă kahan ksiêm Lao hriê čuă, mă bruă ti Việt Nam, nao hlăm klei kƀĭn ksiêm wĭt hdră bi mguôp thŭn 2022 leh anăn klei kƀĭn trông 2 tĭng gưl Khua phŭn bruă plah wah Phŭn bruă kahan ksiêm dua ala čar Việt Nam – Lào kơ klei bi mguôp gang mkhư̆ matuĭ.

Hlăm mmông tŭ drông, Khua knŭk kna mñă klă, 2 ala čar čiăng mđĭ hĭn klei bi mguôp, klei sa ai, bi mguôp kjăp, mâo boh tŭ dưn hĭn, đru kơ grăp ala čar mkŏ mjing bruă duh mkra êngiê, ƀrư̆ hruê ƀrư̆ čŏng pô . Bruă lĭng kahan jing sa kmeh gơ̆ng yuôm bhăn hlăm klei mjĕ giăm 2 ala čar, Khua knŭk kna mñă kơ 2 tĭng lŏ dơ̆ng mtrŭt mđĭ, bi lar hĭn dŭm boh tŭ dưn jăk siam hlăm hruê mmông êgao čiăng rơ̆ng kjăp klei êđăp ênang ala čar, klei êđăp ênang yang ƀuôn 2 ala čar, hlăm anăn mâo klei êđăp ênang êlan internet, klei djăp mnơ̆ng ƀơ̆ng huă, pui kmlă… Hlăm grăp boh klei, boh nik hlăm wưng mâo lu klei dleh dlan, lông dlăng msĕ ară anei.