Tlam mbrue (19/12), ti Hà Nội, Êpul kahan êdeh phiơr – răng mgang wăl adiê kdrăm k’ah mkŏ mjing klei bi hdơr 50 thŭn klei bi blah “Dưi Hà Nội – Điện Biên Phủ dlông adiê” lehanăn drông Khua lăn čar nao čuă lehanăn mă bruă hŏng Êpul kahan êdeh phiơr djŏ hlăm wưng bi hdơr 78 thŭn hrue mkŏ mjing lĭng kahan yang ƀuôn Việt Nam, lehanăn bi hdơr 33 thŭn Hruê jih jang phung ƀuôn sang răng mgang lăn čar.

Blŭ hrăm ti anôk bi tuôm, Khua lăn čar Nguyễn Xuân Phúc lač, Klei bi blah dưi ti Hà Nội – Điện Biên Phủ dlông adiê, bi êdah leh hdră êlan bruă kđi čar, bruă lĭng kahan hŏng klei ktang kjăp mơ̆ng Đảng, lĭng kahan, anei jing klei dưi bruă kđi čar, mâo ai tiê jih jang phung ƀuôn sang Việt Nam, jhŏng mblah, thâo mblah, lehanăn mblah tơl dưi hŏng Mi phung plah ala.  Mơ̆ng klei dưi anei, Khua lăn čar Nguyễn Xuân Phúc lač, mâo lu klei bi hriăm năng ba yua kơ bruă rŭ mdơ̆ng lehanăn răng mgang lăn čar ară anei.  Bi mni kơ dŭm boh tŭ dưn kahan răng mgang wăl adiê – kahan êdeh phiơr mâo leh giăm 60 thŭn êgao, Khua lăn čar ăt lač mơh kơ dŭm klei lông dlăng ti anăp êjai hlăm klei rŭ mdơ̆ng lehanăn răng mgang lăn čar ară anei, lehanăn mtă kơ êpul kahan răng mgang wăl adiê lŏ păn kjăp ai tiê jhŏng ktang, rŭ mjing êpul lĭng kahan ktang kjăp, thâo ba yua kdrăp bi blah mrâo mrang, mă anak mnuih jing boh phŭn kơ klei dưi prŏng hlăm bruă răng mgang lăn čar./.