Aguah 8/11, ti Anôk bruă Khua lăn čar, Khua lăn čar Nguyễn Xuân Phúc bi tuôm hŏng êpul bi ala Êpul hgŭm phung duh mkra mda asei Việt Nam ƀri gưl nao hlăm Knăm mđup brei klei pah mni Mtŭ Hrah - Phung duh mkra mda asei Việt nam êdah kdlưn thŭn 2022.

Blŭ hrăm hlăm klei bi kƀĭn, Khua lăn čar Nguyễn Xuân Phúc mñă klă, wăt tơdah ti anăp mâo lu klei dleh dlan ƀiădah dŭm anôk bruă duh mkra Việt Nam, hlăm anăn mâo phung duh mkra mda asei amâo dưi bi luč ôh klei đăo knang leh anăn brei rơ̆ng bruă klam đru hưn ktưn kơ djuê ana hlăm dlông rŏng lăn. Khua lăn čar lač klă, phung hlăm Êpul hgŭm duh mkra mda asei Việt Nam dôk mjing bruă mă kơ êbeh 3 êklăk čô mnuih mă bruă, prăk hrui wĭt grăp thŭn hlăm brô 30 êklai USD anăn phung duh mkra mda asei amâo djŏ knŏng klam bruă mnia blei, klam bruă hŏng ala ƀuôn, hŏng lăn čar ôh ƀiădah wăt hŏng hƀuê ênuk./.