Blŭ hrăm ti anôk mă bruă, Khua lăn čar Lương Cường mơak mâo nao čuă, phung knuă druh lĭng kahan hlăm êpul kahan prŏng mrô 12, jing êpul kahan knhăk khuăt ktang tal êlâo mâo mkŏ mjing ti Việt Nam. Bi ala kơ Đảng knŭk kna, Khua lăn čar Lương Cường bi mni kơ dŭm boh tŭ dưn lĭng kahan mơ̆ng êpul kahan prŏng mrô 12 mâo leh hlăm wưng êgao.

Khua lăn čar mtă kơ êpul kahan anei lŏ dơ̆ng kiă kriê, gĭt gai ngă tŭ jing hĭn, bi leh mta kñăm mơ̆ng klei bi kƀĭn prŏng Đảng kluôm ala gưl 13, lehanăn klei bi kƀĭn prŏng Đảng kahan gưl tal 11 mtrŭn leh. Êpul kahan prŏng mrô 12 lŏ dơ̆ng ngă jăk klei bi mguôp hŏng dŭm gưl bruă Đảng, bruă sang čư̆ êa ti dŭm anôk êpul lĭng kahan dôk, mkŏ mjing alŭ wăl sa ai tiê hrăm mbĭt hŏng mnuih ƀuôn sang, bi răng mgang kjăp lăn čar./.