Dŭm să Khổng Lào, Hoang Thèn, Mường So mâo 30 alŭ ƀuôn sang, hŏng 3.404 gŏ sang, mâo 5 djuê ana jing Yăn, Thái, Dao, Mông, Dáy dôk hdĭp mda. Mnuih ƀuôn sang ti alŭ wăl mâo klei bi mguôp kjăp, hluê ngă jăk dŭm hdră êlan mơ̆ng Đảng, klei bhiăn ala čar, klei bhiăn alŭ ƀuôn sang, hur har gĭr ktưn mă bruă knuă, bi hrŏ klei ƀun ƀin, truh kơ ară anei 2/3 să mâo ênŭm hnơ̆ng čoh čuăn krĭng ƀuôn sang mrâo. Mnuih ƀuôn sang dlăng yuôm bhăn bruă kriê pioh leh anăn bi lar dŭm knăm knhuah gru, hur har nao hgŭm hlăm dŭm klei bi hmô kriê dlăng alŭ ƀuôn sang…

Blŭ hrăm hŏng mnuih ƀuôn sang, Khua lăn čar Nguyễn Xuân Phúc mñă ktang, klei bi mguôp jing sa knhuah gru yuôm bhăn mơ̆ng djuê ana Việt Nam, grăp čô srăng ƀuh bruă klam pô hŏng alŭ, ƀuôn, hŏng ala čar, uêñ mĭn, sa ai leh anăn bi đru hdơ̆ng pô čiăng kơ grăp čô, grăp gŏ sang mâo klei hdĭp jăk mơak hĭn. Mnuih ƀuôn sang bi mguôp, mkŏ mjing gŏ sang, yang ƀuôn amâo djŏ knŏng mđĭ kyar bruă duh mkra, mâo klei mdrŏng sah ƀiădah lŏ kriê pioh knhuah gru dhar kreh, klei bhiăn jăk siam hlăm gŏ sang, găp djuê, mđĭ ai anak čô thâo gưt, thâo hriăm hră.