VOV4.Êđê- Tŭ ư asăp jak iêu mơ̆ng Khua lăn čar Nguyễn Xuân Phúc, Khua mil čhil Singapore Halimah Yacob mbĭt hŏng ung ñu djă akŏ êpul bi ala gưl dlông Singapore hriê čhưn leh ti Việt Nam mơ̆ng hruê 16-20/10/2022. Aguah 17/10/2022, knăm drông dưi mkŏ mjing ti Adŭ bruă Khua lăn čar. Leh knăm drông, Khua lăn čar bi trông hŏng Khua mil čhil Singapore.

Ti knăm anei, bi trông kơ hdră bi hgŭm wưng ti anăp, dua tĭng tŭ ư mđĭ hdră bi trông êpul gưl dlông, krơ̆ng kjăp klei bhiăn bi hgŭm plah wah Đảng, Knŭk kna, Anôk bruă kƀĭn ala lehanăn mjĕ mjuk mnuih ƀuôn sang, bi hgŭm anôk bruă duh mkra. Khua lăn čar akâo kơ Singapore mjing klei găl kơ dŭm mta mnơ̆ng Việt Nam msĕ si mnơ̆ng lŏ hma, tă kčoh, mnơ̆ng mkra mjing… ba čhĭ ti Singapore; đru Việt Nam nao hgŭm hlăm hdră mkăp mnơ̆ng kơ tar rŏng lăn. Bi trông klei mâo hlăm krĭng lehanăn tar rŏng lăn, dua ala čar mñă klă klei mĭn kjăp mơ̆ng ASEAN ti krĭng Êa ksĭ Ngŏ lehanăn klei yuôm mơ̆ng bruă rơ̆ng klei êđăp ênang, h’ĭt kjăp, êngiê êlan êa, êlan phiơr, msir mghaih klei bi kuan mmaĭ djŏ hdră bhiăn tar rŏng lăn, mâo wăt klei kuôl kă Êpul hgŭm lu ala čar kơ Hdră bhiăn Êa ksĭ (UNCLOS) 1982./.

VOV/Pô mblang: H’Nêč