Blŭ hlăm mmông bi tuôm, Pô bi ala Dhŭng Korea ti Việt Nam brei thâo, Khua lăn čar Nguyễn Xuân Phúc jing sa čô tuê gưl knŭk kna tal êlâo mơ̆ng knŭk kna Khua mil čhil Yoon Seuk-yeol, hluê anăn brei ƀuh Dhŭng Korea dlăng yuôm bhăn klei bi mguôp hŏng Việt Nam. Dhŭng Korea hmăng hmưi gưl nao čuă mơ̆ng Khua lăn čar anăp anei srăng pŏk lu klei găl bi mguôp hlăm lu mta bruă plah wah 2 ala čar, boh nik jing mkŏ mjing klei bi mguôp kơ bruă mkăp brei mnơ̆ng gŭ lăn leh anăn bi klă đa đa hdră mơar hlăm dŭm bruă mkăn.

Khua lăn čar Nguyễn Xuân Phúc brei thâo, klei bi tuôm anei srăng mđĭ hĭn klei bi mguôp, bi thâo klă hdơ̆ng pô, jing wưng čiăng kơ Khua lăn čar ăt msĕ hŏng khua gĭt gai dŭm anôk bruă Việt Nam thâo săng hĭn kơ klei hmăng hmưi, klei čiăng mơ̆ng êpul êya mnuih Dhŭng Korea.