Aguah mbruê, leh nao hlăm klei kƀĭn knơ̆ng bruă Việt Nam – Dhŭng Korea ti ƀuôn prŏng Seoul hŏng êbeh 500 čô bi ala mơ̆ng dŭm knơ̆ng bruă 2 ala čar, Khua lăn čar Nguyễn Xuân Phúc gĭt gai leh mmông blŭ hrăm hŏng dŭm knơ̆ng bruă, knơ̆ng bruă prŏng Dhŭng Korea hlăm bruă ngăn prăk – knơ̆ng prăk.

Hlăm mmông blŭ hrăm, Khua lăn čar mñă klă, Việt Nam dlăng kơ Dhŭng Korea jing ƀĭng hgŭm bi mguôp hdră êlan yuôm bhăn leh anăn sui, hmăng hmưi mbĭt hŏng Dhŭng Korea bi êlam hĭn klei bi mguôp hdră êlan hŏng kmeh gơ̆ng leh anăn boh kdrŭt yuôm bhăn jing bi mguôp bruă duh mkra, mnia mblei leh anăn duh bi liê. Khua lăn čar mñă ktang kơ hdră êlam mrâo mơ̆ng Việt Nam kñăm mkŏ mjing klei găl hĭn, tŭ dưn hĭn hŏng ênoh FDI kơ Việt Nam. Hluê anăn, Việt Nam mlih mơ̆ng klei iêo mthưr ênoh prăk FDI êlâo dih jing bi mguôp wưng sui hŏng phung duh bi liê mơ̆ng ala tač êngao hluê si klei mtăp mđơr, hrăm mbĭt đĭ kyar, mâo klei tŭ dưn, mâo bruă đua klam hŏng yang ƀuôn, mnuih mă bruă, răng mgang wăl hdĭp mda.