Hlăm klei hiu čhưn kơ ala čar Dhŭng Korea, aguah mbrue (5/12) ti ƀuôn prŏng phŭn Seoul, Khua lăn čar Nguyễn Xuân Phúc mâo leh mmông drông phung khua kiă kriê dŭm êpul grŭp prŏng ti Dhŭng Korea hlăk dôk ngă bruă duh mkra ti ala čar Việt Nam.  Drông khua êpul grŭp CJ, mâo Kyung Shik Sohn, Khua lăn čar bi myuôm êpul grŭp anei mâo ngă leh jăk klei kuôl kă dua nah hlăm bruă mkra mjing mnơ̆ng ƀơ̆ng kơ mnuih, kơ mnơ̆ng rông, bruă sinh học, bruă logistic lehanăn bruă dhar kreh.

Khua lăn čar čang hmăng kơ CJ lŏ duh bi liê lu ti Việt Nam, mjing Việt Nam jing anôk phŭn kơ bruă duh mkra mnia mblei hŏng ala tač êngao. Drông khua êpul grŭp Daewoo E&C Dhŭng Korea rŭ mkra sang êa drao prŏng ti Việt Nam. Mbĭt hŏng anăn duh bi liê hlăm dŭm bruă êlan klông pưk sang, bruă êa pui êwa čuh, rŭ mdơ̆ng ƀuôn prŏng thâo mĭn, duh mjing kơ wăl hdĭp mda doh mtah tui si Dhŭng Korea mkŏ mjing ti Việt Nam./.