Aguah 16/17, Khua lăn čar  Nguyễn Xuân Phúc leh anăn mô̆ ñu hŏng Êpul bi ala gưl dlông Việt Nam truh leh ti ƀuôn prŏng phŭn Bangkok mphŭn gưl nao čhưn klă sĭt ti Ala mtao Thái Lan leh anăn nao hlăm Klei bi kƀĭn phung Khua gĭt gai bruă duh mkra Klei bi kƀĭn bi hgŭm bruă duh mkra Asi - Pacific (APEC) tal 29 hlue si asăp Khua knŭk kna Ala mtao Thái Lan Prayut Chan-o-cha jak iêô. Tlam, Khua knŭk kna Prayuth Chanocha leh anăn mô̆ ñu gĭt gai knăm drông Khua lăn čar Nguyễn Xuân Phúc leh anăn mô̆ ñu.

Leh anăn dua khua gĭt gai ngă klei bi trông kơ hdră kơ anăp lŏ dơ̆ng mkra mđĭ tur knơ̆ng mơ̆ng klei bi hgŭm kluôm leh anăn bi kjăp hĭn klei bi hgŭm dua nah. Dua khua gĭt gai ăt srăng dlăng knăm bi siñê lu hră mơar bi hgŭm yuôm bhăn plah wah dua ala čar. Mĭn tĭng, hlăm gưl nao čhưn Khua lăn čar Nguyễn Xuân Phúc srăng bi tuôm hŏng Khua bruă kƀĭn ala Thái Lan Chuan Leekpai, bi tuôm hŏng dŭm anôk bruă duh mkra êdah êdi mơ̆ng dua ala čar leh anăn êpul êya mnuih Việt Nam ti Thái Lan./.