Tŭ drông leh anăn mă bruă hŏng Khua lăn čar leh anăn êpul ngă bruă mâo khua kiă kriê čar Gyeonggi Kim Dong-yeon leh anăn phung khua bruă hŏng tač êngao čar Gyeonggi leh anăn ƀuôn prŏng Gwangju. Gyeonggi jing čar mâo ênoh mnuih ƀuôn sang lu hĭn ti Dhŭng Korea, mâo ênhă prŏng tal 5. Čar mâo 28 ƀuôn prŏng leh anăn 3 kdriêk, knơ̆ng hĭn jing ƀuôn prŏng Suwon. Boh nik, anei jing ƀuôn sang tal 2 mơ̆ng giăm 37 êbâo čô mnuih Việt Nam, hlăm anăn mâo hlăm brô 3.000 čô mnuih Việt Nam hŏng êbeh 500 gŏ sang lu dhar kreh Việt Nam – Dhŭng Korea dôk hdĭp mda ti ƀuôn prŏng Gwangju. Hlăm mmông mă bruă, Khua lăn čar Nguyễn Xuân Phúc mñă kơ khua gĭt gai čar Gyeonggi, ƀuôn prŏng Gwangju leh anăn bruă sang čư êa alŭ wăl mtrŭt mjhar dŭm knơ̆ng bruă hlăm čar pŏk phai hnơ̆ng leh anăn bi lu jơr hdră duh bi liê, mnia mblei ti dŭm alŭ wăl ti Việt Nam, đru kah mbha klei thâo kơ dŭm alŭ wăl ti Việt Nam hlăm bruă kriê dlăng mơ̆ng knŭk kna, čuăl mkă mđĭ kyar bruă hiu čhưn ênguê, bi klă leh anăn tŭ drông lu hĭn mnuih mă bruă mơ̆ng Việt Nam, lŏ dơ̆ng uêñ mĭn kơ dŭm hdră êlan hŏng êpul êya mnuih Việt Nam ti alŭ wăl.

Ti mmăt mbruê, Khua lăn čar Nguyễn Xuân Phúc leh anăn êpul bi ala gưl dlông Việt Nam đuê̆ leh mơ̆ng čar Gyeonggi, nao ti tač êdeh phiơr lĭng kahan ƀuôn prŏng phŭn Seoul, kčưm wĭt kơ ala čar, bi ruê̆ kluôm ênŭm gưl nao čuă ala čar Dhŭng Korea.