Blŭ hlăm knăm anăn, Khua lăn čar Nguyễn Xuân Phúc mñă ktang, kdrŭn ksĭ Liên Chiểu srăng jing anôk kdlưn hĭn amâo djŏ knŏng hŏng bruă dŭ mdiăng, logistic, ƀiădah bruă hiu čhưn ênguê leh anăn bruă mkăn ti Đà Nẵng ăt srăng mâo klei tŭ mbĭt, mkŏ mjing hdră mnia mblei prŏng lu mta, lu mjơr, pŏk phai wăl đĭ kyar amâo djŏ knŏng ti Đà Nẵng, ƀiădah wăt kơ Krĭng kwar krah, rơ̆ng klei êđăp ênang, rang mgang kmeh gơ̆ng ngăn prăk kơ ala čar.

Khua lăn čar lač, anei jing hdră prŏng, mâo hnơ̆ng leh anăn klei duh bi liê prŏng, djŏ tuôm hŏng 4.324 gŏ sang, kyuanăn srăng ngă hmar, mâo hnơ̆ng tŭ jăk, čiăng kơ mnuih ƀuôn sang hnưm mâo klei hơĭt hlăm klei hdĭp, klei ksiêm dlăng, mtrŭt mjhar, mgaih msir klei dleh kpăk jing yuôm bhăn sơnăk.